1. Mahe Ramzan Ke Aakhri Din Jab Eid Ka Chand Nazar Aajata H To Esi Surat Me Tamam Musalmano Par Ek Eham Zimmedari Aajati Hai, Wo Hai Fitra Ada Karna FITRA KYA HOTA HAI? Fitra Eid Ke Din Har Shakhs Ki Taraf Se Wajib Maali Adaygi Hai Chahe Wo Bacha Ho Ya Baligh, Deendar Ho Ya BeDeen

2. FITRA KITNA ADA KAREN? Rozana Khai Jane Wali 3 Kilo Ghiza Ya Uske Barabar Rakam Ada ki Jati Hai.. Fitra Nikalne Wala, Har Shakhs Ki Taraf Se 3 kilo Anaaj Jo Uske Shehar Ya ilake Me Khaya Jata H Use Fitre Ke Taur Par Nikale Jaise Gehu,Chawal Ya Uski Qimat Ko Fitre Ke Unwan Se De

3. FITRA DENE KA WAQT ? Fitra Dene Ka Waqt Mahe Ramzan Se Hai.. Mahe Ramzan Se Pehle Fitra Nahi Diya Jasakta..Jab Mahe Ramzan Aajay Tab Aap Fitra De Sakte Hain..Ehtiyat Mustahabb Ye Hai Ki Aap Shab e Eid e Fitr Mein Fitra Ada Karen..

4. Fitra Mahe Ramzan Ke Aakhri Din Ke Ghurub Se Eid ul Fitr Ke Din Namaz e Eid Se Pehle Tak Ada Karna Chaiye.. Jo Shakhs Namaz e Eid Padhna Chahta Hai To Namaz e Eid Se Pehle Ada Karen..Aur Jo Namaz e Eid Nahi Padhna Chahta To Esa Shakhs Namaz e Zohar Se Pehle Tak Fitra Ada Karde

5. FITRA KON ADA KARTA HAI KISPAR WAJIB HAI? Fitra Un Logo Par Wajib Hai Jo Shab e Eid e Fitr, Suraj Doobne Ke Waqt - - Baligh Aur Aaqil ho - Behosh Na Ho - Faqeer Na Ho Ye Zimmedari Uss Shakhs Ke Liye Hai Jo Ghar Walo Ke Liye Kamata Ho Aur Khud Faqeer Bhi Na Ho

6. Aisi Surat Mein Uss Shakhs Par Wajib Hai Ki Wo Apna Fitra Aur Un Afrad Ka Fitra Ada Karega Ki Jiska Wo Kharcha Chalata Hai..Jiska Wo Kharch Chala Raha Hai Wo Chahe Musalman Ho Ya Gair Musalman, Bacha Ho Ya Bada.. Har Ek Ka Fitra Nikalna Zaruri Hai

7. Wo Shakhs Jo Chand Raat Uske Yaha Mehman Raha Hai Uska Fitra Bhi Maizban Ke Zimme Hoga..Lekin Agar Ghar Ka Sarparast Fitra Ada Karne Ke Qabil Na Ho To Ghar Ke Dusre Log Jo Fitra Dene Ke Qabil Ho Fitre Ki Adaygi Unki Zimmedari Hai..

8. FITRA KISE DENA CHAIYE? Fitra Momin Shakhs Ko Den Aur Agar Momin Na Mile To Nasibi Ke Alawa Kisi Bhi Ghareeb Musalman Ko De Sakte Hai..Iske Alawa Marja' Taqleed Ke Numaindo Ko Bhi Fitra Diya Ja Sakta Hai Taaki Wo Ahkam Ke Mutabiq Unhe Taqseem Kar Sakay..

9. -Mustahab Amal Hai Ke Fitra Pehle Apne Rishtedaro, Aur Padosiyo Ke Mustahiq Logo Ko Dein Aur Phir Dusre Logo Ko.. - Fitra Shia Isna Ashari Fuqra Ko Dena Chaiye Aur Agar Shehar Mein Shia Mustahiq Na Ho To Koi Aur Muslim Faqir Ko Bhi De Sakte Hai - Syed, Syed Ko Fitra Desakte Hai

10. FITRA KISE NAHI DESAKTE ? - Nasibi Shakhs Yaani Aima Athar (a) Ke Liye Galat Alfaz Istemal Karta Hai - Sharabi,Be Namazi,Ya Khule Aam Gunah Karta Ho - Jo Fitre Ki Raqam, Gunah Ke Raste Me Kharch Kare - Jiska Fitra Khud Aapke Upar Wajib Ho - Gair Syed, Syed Ko Fitra Nahi Desakte

11. FITRE KI NIYAT ? Khuloos Aur Qurbat Ki Niyat Se Fitre Ko Ada Karen..Agar Koi Shakhs Bagair Khulus Ke Ya Bagair Qurbat Ki Niyat Ke Fitra Ada Kare To Esi Surat Mein Uske Zimme Se Wajib To Ada Hojayga Lekin Esa Shakhs Gunhegar Zarur Hoga..

12. FITRA DENE KE FAYDE? - Rozi Ke Kamal Tak Pohchne ka Zariya - Ainda Saal Tak Maut Se Mehfuz Rehne Ka Zariya - Jism Aur Rooh Ki Salamati - Ghareeb ki Madad [Al Kaafi V4 P174] [Man La Yahzarahul Faqeeh V2 P:83]

13. Jab Hum Kisi Mustaheq Ko Fitra Den To Hamare Zehan Me Ye Khayal Hona Chaiye Ki Hum Mustaheq Par Ehsan Nahi Kar Rahe Balki Uss Mustaheq Ki Wajah Se Aapka Ek Wajib Aasani Se Ada Ho Raha Hai.. Aur Hum Mustaheq Ko Nahi De Rahe Hai Balki Hum Ye Fitra Allah Ko De Rahe Hai..

14. Jab Hum Fitra Nikal Rahe Ho To Use Hume Halal Maal Se Nikalna Hai.. Haram Maal Se Fitra Ada Nahi Karna Hai..Fitre Ki Raqam Jo Ada Karni Hai Wo Jaha Hum Reh Rahe Hain Uske Mutabiq Ada Karni Hai..